Նույնիսկ եթե 2-3 օրով եք եկել Հայաստան, անպայման այցելեք Սյունիք մարզ՝ Հայաստանի ամենամեծ (4540 քկմ) և ամենալեռնային շրջանը: Սյունիքի միջին բարձ¬րու-թյունը ծովի մակերևույթից 2200մ է: Միևնույն ժամանակ, Սյունիքն առանձ¬նանում է նաև բարձրությունների մեծ տարբերությամբ: Սյունիքի ամենաբարձր կետը Կապուտջուղն է՝ 3906մ, իսկ ամենացածր կետը՝ Մեղրիի կիրճը՝ 375մ:
Այս շրջանի մուտքն անցնում է հայտնի Սյունիքի դարպասների միջով, մի հսկա հուշարձան՝ 2400մ ծովի մակերևույթից բարձր: Այստեղ նույնիսկ հայկական ամռանն է զով ու քամոտ լինում, բայց թող դա չվախեցնի Ձեզ, կանգ առեք Սյունյաց աշխարհ մտնելիս, լիաթոք շնչեք լեռնային թարմ օդը և ճաշակեք ամենահամեղ կենարար ջուրը, որը սկիզբ է առնում Զանգեզուրի լեռներից:&nbsp;
Սյունիքի մարզկենտրոնը Կապանն է՝ Սյունիքի ամենախոշոր քաղաքը: Կապան նշանակում է դժվարանցանելի նեղ կիրճ: Քաղաքը գտնվում է Ոխչի գետի հովտում՝ Խուստուփ լեռան ստորոտում, մասամբ էլ՝ փեշերին: Դա մի փոքրիկ կանաչ քաղաք է՝ ոչ բարձր շենքերով:&nbsp;
Եթե Հայաստանի խորհրդանիշը Արարատ լեռն է, ապա Կապանի խորհրդանիշը Խուստուփն է՝ 3200 մ բարձրությամբ: Հինավուրց ժամանակներից լեռան լանջերին մեր նախնիներն իրենց հեթանոսական տոների ժամանակ փառաբանում էին արևը, որից սկզբնավորվում էր ամեն կենդանի արարած երկրագնդի վրա:
Խուստուփի լեռնաբազուկները հարուստ են պղնձի հանքավայրերով: Պղնձահանքերը սկսեցին աշխատել միջնադարում, իսկ քաջարի զորավար Դավիթ Բեկի բանակի ազատագրական պայքարի ընթացքում նույնիսկ թնդանոթներ են ձուլվել: Կռվել զանգեզուրցիները կարողանում են և դա ապացուցել են բազմիցս՝ ամեն անգամ, երբ պաշտպանել են իրենց մի բուռ հողը թշնամուց:


Ի՞նչ տեսնել:
Սյունիքում է գտնվում հին հայկական աստղադիտարան Քարահունջը՝ հայտնի նաև Զորաց քարեր անունով, որը համարվում է Սթոունհենջի հայկական նմանօրինակը: Իսկ գուցե ճիշտ հակառա՞կը, Սթոունհե՞նջն է համարվում հայկական Քարահունջի նմանօրինակը՝ հաշվի առնելով մեր աստղադիտարանի տարիքը: Չէ՞ որ Քարահունջը մոտ 2500 տարով ավելի հին է, քան Սթոունհենջը: Դեռևս 7500 տարի առաջ մեր նախնիները ուսումնասիրում էին աստղերը, հետևում ժամանակի ընթացքին, օրացույցներ կազմում և երկրպագում իրենց աստվածներին:
Սյունիքում է գտնվում 9-րդ դարում կառուցված Տաթևի վանքը, որի պատերի ներսում գործում էր հանրահայտ Տաթևի համալսարանը: Կա ևս մեկ պատճառ, թե ինչու է պետք այցելել Տաթև: Դա աշխարհում ամենաերկար հետադարձելի, անկանգառ ՏաԹևեր ճոպանուղին է:
Տաթևի վանքից ցած գտնվում է Սատանայի կամուրջը՝ բնության մի իսկական հրաշք՝ 60մ երկարությամբ և 30մ լայնությամբ: Քամին ու ջուրն են ստեղծել այս կամուրջը: Կանգ առեք կամրջի մոտ, իջեք գետը, սուզվեք տաք բուժիչ աղբյուրների մեջ և կզգաք, թե ինչպես է Ձեր մարմինը լցվում էներգիայով: Եթե Ձեր խիզախությունը ներում է, ապա մտեք բուժիչ ջրերի տակ թաքնված առեղծվածային քարայրները: Համարձակների համար իսկական արկած է:&nbsp;
Մեկ ուրիշ հրաշք է Շաքեի ջրվեժը: Ասում են, թե Շաքե են կոչել այն գեղեցկուհուն, ով թշնամիների ճամբարում հարճ չդառնալու համար նետվեց գետը ՝ փորձելով փախչել: Թշնամիները հասան նրան, բայց չհասցրին բռնել. հենց նույն վայրկյանին նրա ոտքերի տակ ժայռ գոյացավ, և ջուրը թաքցրեց կապուտաչյա գեղեցկուհուն: Այդ ժամանակվանից աղջկա մահվան վայրում առաջացած ջրվեժը ստացել է Շաքեի ջրվեժ անվանումը: 18մ բարձրությունից գահավիժող ջրվեժը հիշեցնում է այն գեղեցկուհու վարսերը, ով մահը գերադասեց գերությունից:
Եվ, վերջապես, համտեսեք տեղական խոհանոցը: Ավանդական հայկական խորովածի հետ մեկտեղ փորձեք հանրահայտ խաշիլը, որն այսօր էլ եփում են այնպես, ինչպես 100-200 տարի առաջ:&nbsp;

Սյունիք արժե այցելել գիշերակացով, որպեսզի և' հասցնեք ամեն ինչ տեսնել, և' հաճույք ստանաք Ձեր ուղևորությունից: Բարեբախտաբար այստեղ կան բազմաթիվ հյուրանոցներ և հյուրատներ, իսկ տեղացիները միշտ ուրախ են հյուրեր ընդունել:
Սյունիք այցելելու լավագույն ժամանակը գարունն է: Մարգագետինները, հանց հայկական գորգեր, հյուսված են ալպիական ծաղիկներից, իսկ շուրջբոլորը ձյունագագաթ բարձրաբերձ լեռնաշղթաներ են, խորը ձորեր ու կիրճեր՝ ծածկված կանաչ թավիշով ու խիտ անտառներով: Այսպիսին է Սյունիքը տարվա այս եղանակին: Իսկ բարձր երկնքում ճախրում են արծիվները՝ այս հողի հպարտ պահապանները: Այնպիսի տպավորություն է՝ կարծես դրախտ եք ընկել: Ոչ մի նկարիչ չի կարող այսպիսի կտավ ստեղծել: Եղանակն այստեղ փոփոխական է. մերթ ստիպված եք անցնել խիտ մառախուղի միջով, մերթ տեղատարափ անձրև է թափվում, իսկ անձրևից անմիջապես հետո սկսում է պայծառ արևը շողալ, և անձրևի կաթիլները, որ չեն հասցրել գոլորշանալ, կսկսեն արևի տակ շողարձակել ցիրուցան եղած թանկարժեք քարերի նման՝ կլանելով ալպիական ծաղիկների բոլոր խելահեղ գույները: Շունչդ կտրվում է այդպիսի գեղեցկությունից:&nbsp;
Սյունիքը հիասքանչ է իր բնությամբ, կախարդական՝ իր բազմադարյա լեռներով ու քարանձավային բնակավայրերով: Սյունիքը հայ ժողովրդի իմաստնության օջախն է:
Ցանկանու՞մ եք բացահայտել Հայաստանը, ուրեմն այցելեք Սյունիք:&nbsp;

Սյունիք

Նույնիսկ եթե 2-3 օրով եք եկել Հայաստան, անպայման այցելեք Սյունիք մարզ՝ Հայաստանի ամենամեծ (4540 քկմ) և ամենալեռնային շրջանը: Սյունիքի միջին բարձ¬րու-թյունը ծովի մակերևույթից 2200մ է: Միևնույն ժամանակ, Սյունիքն առանձ¬նանում է նաև բարձրությունների մեծ տարբերությամբ: Սյունիքի ամենաբարձր կետը Կապուտջուղն է՝ 3906մ, իսկ ամենացածր կետը՝ Մեղրիի կիրճը՝ 375մ:

Սյունիք

Ինչու ենք մենք սիրում Սյունիքը

Տուր և տոմսեր

Bustourma-ն խորհուրդ է տալիս